Ang ating Diyos ay tunay na matapat!!! Last June 26, 2005, we have celebrated our 26th Anniversary. Minsan pa ay aming natunghayan ang kabutihan ng ating Panginoon sa iglesyang ito magmula pa ng ito ay naitatag noong 1979. Ang programa ay binuo ng ibat-ibang presentasyon mula sa Youth, Junior Youth, Childrens Group, Womens Group, Choir, Praise team at tunay na ang lahat ay napuno ng kagalakan sa pakikibahagi para sa selebrasyong ito. Ang BBC ay sinimulan bilang ministry para sa mga bilanggo. Ang mga naunang mangagawa at mga Pastor ay kapwa mga dating bilanggo na tumanggap sa hamon ng Diyos para sa kanyang gawain. Sa paglipas ng mga panahon ay marami ng buhay ang nabago at binago ng Diyos sa pamamagitan ng iglesyang ito at ng mga tagapaglingkod na sa simula't simula pa'y naging matapat sa pagsunod.

Ang kasalukuyang Bukangliwayway Baptist Church ay bagong henerasyon ng mga mananampalataya. Karamihan ay mga kabataan, mga kabataang punung-puno ng pag-asa at pagkasabik sa mga bagay na maaari pa nilang maranasan sa Panginoon sa pagpapatuloy ng kanilang paglilingkod. Kami ay taos pusong nagpapasalamat sa ating Diyos sa karagdagang taon na ibinigay para sa Kanyang gawain, harinawa'y patuloy pa kaming gamitin ng ating Ama upang abutin ang mga buhay ng mga taong naliligaw ng landas, harinawa'y patuloy pang mag-ibayo ang init sa aming mga puso na ipahayag ang Kanyang mga salita.

Nais naming alalahanin sa pagpapasalamat ang mga taong naging bahagi ng kasaysayan ng iglesyang ito. Rev. Roger Arienda, Rev. Macasero, Cesar Guy, Eng'r. Phop Larrabaster, Cesar F. Suck, Rev. Jimmy and Ruby Lim, Atty. Jake Chua, at ang aming kasalukuyang pastor kasama ng kanyang maybahay, Rev. Edward at Beng Loyola.

Ngayon ay isang panibagong taon ang aming haharapin, naghihintay ang ubasan, marami ang aanihin. Kami ay buong kasabikan at pagtitiwala na humahakbang patungo sa katuparan ng mga panukala ng ating Diyos sa aming mga buhay. Kayo handa ba kayong sumama sa hamon?